i love having break!

Am letschte Dsischtig semmer heicho vom Feriehüsli. Öppe am vieri hemmer eus ufe wäg gmacht, drom esches zemmli spot worde bes mer denn äntlich deheime acho send ;) Ich bin soo müed gsi vom snowboarde a dem tag, dasi die ganzi Fahrt nome gschlofe han. Es isch mega gmüetlich gsi, will mir hend  chönne s bett im Wohnmobil uszieh und ich han schön chönne schlöfele. (Wer wett das scho ned, reise im eigete Bett? )
Nach dene Feschttäg met VEEEELL! ässe hemmer werkli s Gfühl gha s seig langsam a de Reihe weder is Fitness z go ;) Drom hemmer am Mettwoch vell Zit im Fitnesscentrum verbrocht. - Hui das hed guet do!
Noch dem Endorphineusschoss hani mi zemmli Glöcklech gfühlt, ond drom hani öppis loschtigs welle mache. Schlossändlech send ech ond d Kajsa zu de Kollegin hei - zu de janay - met de Sierra ond dete hemmer es chlises Fürli gmacht henderem Hus ond send chli om s Fürli ghöcklet. Wos denn langsam chalt worde isch simmer is Huus gange und hend Pitch Perfect gluegt. Ich liebe dä Film! wenner dä nonig gseh hend münderne umbedingt luege, sobald er denne in Dütsch usechund. Ich liebe d Fat Amy. hihi so luschtig!
... wie au immer, am Dunschtig sind d Kajsa, d Miranda, de Lance und Ich uf San Luis Obispo gange und sind chli go lädele. Allerdings hed niemer öppis kauft. Ich bin mega gärn z San Luis, s isch so gmüetlich und det sind all die härzige chline schöne aber leider türe Chleider läde mit de schönschte Chleider! :)
Ehrlichgseit weissi nümme gnau was mer gmacht hend am Dunschtig Abig, so vill sache am laufe do äne :)
Aber am Fritig simmer zu de Sophia hei, d Ustuschschüelerin vo Italie. Mir hend en Girly film gluegt und gredet bis i die spati nacht. Am nächschte Morge hemmer denne gschlafe bis am Mittag . ehn richtige girlie obig. Am nögschte Morge, nacheme feine Brunch hed si üs denn ihri Nachberschaft zeigt und mir sind chli go  laufe für en gueti Stund - das isch u schön gsi! Am Nammitag simmer denne is BRU, mis lieblis café da in Atascadero, mitem beschte Kafi. Döte hemmer denn alli chli i eusne Tagebüecher gschribe und drüber nachedänkt, wie s sii wird wenn das Ustuschjahr verbi isch... komische gedanke und mer chas sich so ned vorstelle das das denn eifach verbi isch und die wider soo wird sii...
.. mir hend au es paar pländli gschmidet für üsi Reisene wumer dänn wend mache zum enand bsueche nögscht Jahr. Ich findes mega cool das ich jetz lüt kenne vo de ganze Wält, ned?

Uf jede Fall, am Abig simmer denn uswärts go znacht ässe und denne zu de Sierra hei. Si hed es par lüt iglada, ich glaub mir sind öppe 10 gsi und mir sind wider umnes fürli ume ghocked. Allerdings heds denn afo rägne und mir sind ine go Wii Dance spile. Es isch en mega luschtige Abig gsi und mir hends gnosse chli öppis mit Lüt vo de Schuel z unternäh. Womer hei cho send hemmer no chli mit de Miranda gredt ond denne en plötzliche Heisshunger i de Nacht becho. haha drum sind ich und d Kajsa  nach dem mir scho fascht gschlafe hend nomol ufgstande und hend Cornflakes gässe zmitzt i de Nacht. hihi - die Aktione wirdi ja vermisse...!

chline Mitternachtssnack