Golden Gate, Facebook and Google? :)

Mir hend sogar no rächt guet übernachtet uf dem Supermarket Parkplatz. En Maa wo mer am vorhärige Tag no troffe hend, und dä hed schwizerdütsch chönne, hed eus empfohle de Waldo Point Harbor go aluege, das hemmer denn au gmacht, bevor mer überhaupt wükli usem Pyama usecho sind. S isch äbe ned so schöns Wätter gsi drum hemmer eifach alli dänkt mir hend ja es fahrends Huus, wiso söttemer au usem Pyama use sp früeh am Morge ;)
De Waldor Point Harbor bestoht us Huusschifflis, also würkli Hüser wo schwümmed, nöd nur es Huusschiff.! Die Hüsli sind alli u herzig, und zum teil Uralt gsi... isch cool gsi zum das vo nöcherem aluege. Die läbed alli rächt nöch anenand, aber die cheibe Dinger sind ame no erstuhndlich gross gsi!

Nach dem chline Bsuech bi dene Schiffhuus I-wohner simmer denn los zoge, richtig Golden Gate Bridge, wo ja numeno öppe 10 Minute vo döt entfärnt gsi isch. I dem Fall simmer denn vom Norde här über die Brugg gfahre und ich bin mir tatsächlich fascht chli vorcho wie i de Filme, allerdings ischs halt ebe scho rächt näblig gsi.

Ich han ghört säge dass es wükli sehr sälte isch dass d Golden Gate Bridge nöd im Näbel isch, aber das isch villich sogar au chli das wo's so speziell macht. 

Uf emne chline Restplatz hemmer parkiert und es paar Föttelis gmacht, also rächt vill Fötteli muessi also säge.! ;) Touriste halt! Mir heds jedefalls u spass gmacht, fötteli vo de Brugg z mache, ob mit Mönsche im Bild oder ohni.. s gsed eifach so guet us wie d Bruggspitze im Näbel verschwindet...

Nachdem mer tuusigi vo Fötteli gmacht hend vo dere schöne Brugg hemmer eus wider ufe Wäg gmacht ufem 101South. Euses negschte Übernachtigsziel isch gsie Santa Cruz aber de Dad het unterwägs umbedingt no welle in Palo Alto verbieluege.

Mir sind dür d Stadt düregfahre und hend d Stanford University gse, wo meega schön gsi esch. S Stedtli isch au u herzig gsi ond s hed mega vill Studänte gha. Was mer aber eigentlech hend welle aluege esch s Facebook ond s Google Hauptquertier gsi. Allerdings hemmer das nöd gfunde und eus denn entschide, halt eifach witer z fahre. Einisch hemmer usversehe die falschi Abbiegig gno und wo mer chli witer gfahre sind zum go kehre, voila simmer grad am Facebook Hauptquartier verbigfahre. De Dad het natürli u freud gha..!

Mit eusem rise Wage simmer zmitzt vor dem Facebookgebäude parkiert und hend alles chli agluegt. De Security Guard isch natürli die ganzi Zit um das Huus umegfahre, demit au ja niemert cha umespioniere. Natürlich hemmer au no es Fötteli vorem grosse Sign gmacht.

Langsam simmer hunger worde und drum simer wider zrug uf die richtig Strass. Mir sind amne IN n Out verbigfahre, de beschti Burgerplatz da, und will ich ihne han welle de IN n OUT zeige hemmer denn au de Exit gno. Allerdings simmer döt namal falsch abboge und hend de IN n OUT plötzlich nümme gseh, allerdings simmer zmitzt ufem Google Hauptquartier glanded... Mir hend ja schön glachet! zweimal verfahre und denn aber döt glanded wo mer eigentli am Afang mal hi hend welle.

Das Grondstöck esch werklech riisig gsi ond mega mega schön! Die hend en rechtige Garte met alles super schöne Blueme ond Bäum ond en Teich ond Picknickstüehl.. onglaublech ;)

Wo mer das denn au alles no agluegt hend semmer äntlech i IN n OUT euse Burger go ässe ond denne semmer uf Santa Cruz gfahre. Uf dem Wäg fahrt mer zemmlech alles chli a de Küste nache ond es isch uu windig gsi, drum heds eus fasch wägblose.. hihi

In Santa Cruz hemmer lang müesse für euse Campingplatz sueche, aber mir hend denne es Pärli gfragt, wo eus det hii gfüehrt sind. Es isch en coole Wohnmobilstellplatz gsi, grad prakitsch im Hafe inne. Also würkli zäh meter vo eusere Hustür isch s Wasser mit all dene Schiffli gsi. U schön gsi und mega gmüetlichi atmosphäre. Ich bin denn no chli an Beach abe go jogge und mir hend de Grill ufgstellt zum Znacht mache.

Plans on the second day in san Francisco

Am Fritig Morge hemmer im San Francisco i de Stadt mit de Kajsa ihrere Familie, wo zu dere Zit au da gsi sind, abgmacht demit sich eusi Eltere chönd könnelehre. Also am 10:30 hettemer sölle im Olympic Café si! Super früeh simmer demfall am 9:30 uschecked im Camping und denn mitem Wohnmobil id Stadt gfahre. En Parkplatz hemmer im Internet scho usegsuecht gha und de Verker hemmer i eusem Zitplan au iberächnet. Hätt jo alles chönne perfekt si, oder? Aber s Glück isch a dem Tag ned so a eusere Site gsi. Also zerscht emol isch es Baseball gsi, genau döt wo mer id Stadt cho sind also hemmer no zuesätzliche Verkehr gha und Mönsche überall.. Das wär aber no gange und mir wäred immerno guet i de Zit gsi... Denn simmer acho döt wo mer hend welle parkiere und denn sind die de Platz am Umbaue gsi.. (de Pier 9) ! Also simmer witer gfahre und hend sooo lang für en Parkplatz gsuecht, vorallem für euses grosse Ding. Nach öppe 10 Minute ufwärts fahre immer witer und witer empfärnt vo eusem Zielpunkt, hemmer denne äntlich en grosse Parkingplatz gfunde. Mir sind los gloffe richtig Tramstation und nach öppe 5 Minute laufe merkt de Dady dass er sini Kreditcharte im Auto gla het... de Nili isch denn zruggsecklet zum si hole. Nach öppe 10Minute isch er allerdings immer nonig zrugg gsi. Denn bin ich halt au no zrug zum Wohnmobil jogget und er isch immerno am Kreditcharte sueche gsi. (Er het halt nöd gnau glosed und denn au nöd gwüsst wo sie isch haha) Denne simmer wider zruggsecklet und zu de Tramstation gloffe ) :) denne hemmer es super langsams tramm gha wo no hed mösse ahalte well ergendöppis met de leitige nöd gstumme hed. Und womer äntlich acho sind simmer z früeh usgsitge und hend ewiglang müesse nach dem Kafi sueche.

1. Versuch z Parkiere -  sind aber weggschickt worde

Schlussändlich, nach all dem Päch hemmer denne das Kafi äntlich gfunde, wo übrigens am andere ändi vo San Francisco gsi isch als mir parkt hend.. hihi... de Kajsa ihri Familie hed halt scho gässe gha und drum hemmer nur es chlises Schwätzli ghalte und sie hend denn witer müesse. Aber isch glich guet gsi hend sie sich no chönne kennelehre!

Mir hend denn au no euses hert verdiente Zmorge gässse i dem Olympic Cafe. Es isch uuuuumega fein gsi! Ich han e Waffle mit Banane und Blueberries.. so fein! Allerdings rächt gross! Wieauimmer.. mir hend welle zahle und denne erscht usegfunde das die nume Cash nämed. Und mir hend ebe nur d Kreditcharte und EC Charte debii gha will das sött ja eigentli überall funktioniere. Drum hed de Dad müsse zumne Bankomat ga go Gäld usela, dä Bankautomat het allerdings nöd funktioniert und er hed müesse wider dur die halb Stadt laufe zum uf ne Bank z ga, nur zum Cash hole... Mir hend alli im Restaurant öppe en Stund gwartet, bis er dänn wider zweimal dur das San Francisco düregstöberet isch, aber dänn hemmer au äntlich chönne witer gaa...

San Francisco Pier 39

... Wills so schöns Wätter gsi isch simmer wider zrug zum Wohnmobil gloffe dasmal, ohni s Tramm z näh. Vo döt us simmer us de Stadt use und über d Bay Brugg, übere uf Oakland und vo det simmer über en anderi Brugg, d Richmond Bridge, übere bis uf Sausalito.

-Bay Bridge

Richmond Bridge

Euse Plan wär gsi a dem Tag au no grad d Golden Gate Bridge z mache, aber wo mer det in Sausalito düre gfahre sind hemmer eigentli gar nümm witer welle a dem Tag, wills eus dete so guet gfalle het. Das isch ja s praktische mitem Wohnmobil, chasch stoppe wo immer du wötsch ;)
Sausalito isch so es rächt grüens Städtli, obe a San francisco, mit de Golden Gate Bridge dezwüsche. Eigentli findi das de perfekti Ort zum wohne, du bisch sooo nöch a San Francisco, aber die Umgäbig döt isch eifach wunderschön. Alles grüen, schöni Hüser und au en mega schöne Hafe. Hed mi wükli fasziniert.
I dem Sausalito hemmer eus denne ufmene Supermarket Parkplatz parkiert und det s erschte mal 'wild'... oder eifach nöd ufmene Campingplatz ;) übernachtet. Mir hend sogar no schön chönne go Znacht poschte ond früsch choche.

Sausalito

San Francisco!! I love this city

I de Nacht isches dänn u chalt worde, aber mir hend zum Glück euses chline Öfeli gha zum chli heize. Am nögschte Morge nachem Zmörgele hemmer denn de Bus gno id Stadt San Francisco. Womer vo de U Bahn ufe cho sind simmer zerst grad mal chli verschrocke wie gross das alles gsi isch. Inere grusige chline Vorstadt semmer igstige und denne zmitzt i San Francisco wider usgstige. Mega grossi Buildings und u vill Lüt. Die Buildings hend mir aber alli mega gfalle und d Architektur isch faszinierend gsi. Mir sind dänn im Unionsqare eifach mal ine Richtig gloffe, d Strass deruf. Hani so cool gfunde, wie die Strasse alli sone grossi Stigig hend und denne i de Mitti d Cable Cars. Ihr glaubed gar ned wie vill Fötteli ich gmacht han! Mit em Wohnmobil wär das ja unmöglich gsi zum umefahre det. Womer denn alles ufegloffe sind a dere Strass hemmer alles chönne abeluege, und s hed u geil usgseh.! ;) S Mami und ich hend eus gfühlt wie die japanische Touriste in Luzärn mit de Nikon Kameras. ;)  Mir sind au no Chinatown det go aluege & det chund mer sich würklich vollkomme wie in China vor. Alli Lüt sind Asiate und d Läde hend alles so billigi Chinaproduktione. Sogar d Schriftzüg sind uf chinesisch gsi. Debi isch ja das alles zmitzt in San Francisco. A de Marketstreet simmer dänn go Zmittag ässe und no chli go shoppe. Au en Mall hets no gha i dere Stross, met  alles so türe Markeläde.

Min I-Druck vo de Stadt isch würkli rächt guet und ich han au s Gfühl gha s isch no einigermasse suber gsi, ussert dases halt vill heimatslosi Bättler ume gha het. Aber ich würd also sofort nomal ga!

Geg de Abig simmer denn wider mitem Bus zrugg uf de Camping, wo’s denn rächt Näbel vo de Küste här gha hed, drum simmer eifach nur im Wohnmobill a de Wärmi ghocket. Zum Znacht hani für alli Fajitas gmacht. Isch also en super Tag gsi, abgseh halt vom Wätter. Aber vo dem hemmer eus ned lo störe lo.

Monterey Harbor

Am Mittwoch simmer dänn in Norde zoge, mitem Ziel San Francisco. Scho am Morge früeh simmer losgfahre, nachmene improvisierte Zmorge, will mer no nüt sind go ichaufe. Ich han denn eifach es paar Sache im Huus ine gstibitzt und mir hend chli öppis zämebastlet. So am nüni simmer denne losgfahre und hend öppe i de Mitti vom Wäg, in Monterey gstopped zum de Fishermans Wharf aluege döt. Zmittag hemmer imene chline Restaurant grad am Hafe gha. – Fish and Chips und Claim Chowder (weiss nöd gnau wiemer das schribt, aber isch ja nöd so wichtig..) Es isch scho rächt windig gsi döt am Meer, aber u schön! Jeni Schiff heds im Hafe gha und in en en früsche Fischmark simmer no ine. S chline Hafemarktdörfli mit de Touristelädeli simmer au no go aluege, bevor mir denne wider witer in Norde ufegstoche hend.

Nach insgesamt öppe 4 Stunde fahre simmer denn äntlich uf eusem Camping usserhalb vo San Francisco acho. No schnäll go Ässe chaufe und Spaghetti kochet hemmer und denn simmer au schowider rächt müed gsi. Isch halt en lange Reisetag gsi mit vill Impressione ufem Wäg, Kalifornie isch halt sooo schön!.. Und es isch so gmüetlich  gsi, mit minere Familie Zit z verbringe! Han si halt scho rächt vermisst gha.

xoxo


Pictures from Monterey Harbor:

de erschti Tag met minere wondervolle Familie

Am nögste Morge bin ich scho mega früeh ufgwachet, will ich so gspannt gsi bin uf de Tag, drum han ich den Pancakes für alli kochet. Äntlich hani minere Familie mal chönne mini Gastschwöschter vorstelle. Zerscht hemmer nur mit de Miranda Zmorge gässe, aber denn isch d Gastmuetter au no cho wo sie ihri Arbeit im Fitnesstudio abgschlosse het. Sie hed u freud gha, mini Familie äntlich mal z träffe, nöd nur über Skype.

So ufe Mittag zue sind mini Familie und ich dänn uf Pismo Beach gfahre mit de Brenda ihrem Auto und ich ha ihne mine Lieblingsstrand zeigt. Sie hends au u schön gfunde! Döt isch eifach es mega Paradies! Es hed zwar chli gwindet aber det chund mer eifach en super Idruck vomne Californie Beach über.

Au s Pismo Beach Outlet Shopping Center hani ihne no zeigt, mir sind in en Surfer Lade und in Nike Outlet. Im Subway hemmer schnell es Sandwich zur Verstärkig gha und denn simmer wider zrug uf Atascadero, no mini Schuel go aluege. Das isch natürlich sehr interessant gsi für sie, mal z gseh wo ich so de gröschti Teil vo mim Ustuschjahr verbringe. Am Abig het d Brenda, mini Gastmuetter für alli Znacht kochet und mir hend zäme Znacht gässe und chli gscwätzed J So komisch die zwei Familie zäme am Tisch z gse, mini amerikanischi und mini richtigi Familie. Das chani mir eifach nöd so ganz vorstelle, das die am gliche Ort sind. Es isch au no rächt asträngend gsi, uf z passe dases da kei Missverständnis gid mit de Sprach! Aber s isch flott gsi und au mit em English für mini Familie hets denn also no rächt guet klappet zum sich verständige. Nach vielem klatsch und tratsch und nachdem mir allne no ihres eigete schwizer Sackmässer und ihri Schoggi verteilt hend sind denn alli scho rächt früeh zimmli müed gsi und mir sind wieder veruse, eus im Wohnmobil go gmüetlich mache. I de Nacht isches rächt chalt gsi, zum Glück hemmer so viel Deckene gha!

 

my american house