Family!

My family is going on the airplaine in Switzerland right now! I'm sooo excited to see them again after eight months!
So happy that they can come visit me here! I don't believe it!

last day in capistrano beach

Was für en fridliche Tag... chli relaxe am Pool und eifach no chli s Feeling vo de Ferie gnüsse! Chli brun wärde und Erdbeeri ässe. So chönnts also no öfters si!

Am Abig simmer no zum letschte mal im japanese Steakhouse fein go ässe und mir hend alli en riiiisigi Portion übercho, ich han nöd mal d Helfti möge ;)

xoxo

fourth and fifth day in capistrano beach

So.. Äntlich hani widermal WIFI und vorallem Zit zum a mim Blog witer z mache, ich bin ja völlig hindedrii, immerno am vo de letschte Ferie schribe, debi bini scho i de nögschte Ferie :)

Am Dunnschtig in Capistrano Beach hemmer eigentli nöd wükli vill gmacht, ussert das mer ines Starbucks sind go Husufgabe mache.. nöd wükli cool. Aber will mer die Wuche frei gno gha hend hemmer müesse es par Sache nachehole damit mir dänn wenn mer zrug cho sind wider ufem gliche Stand sind gsi.
Am Abig bini no mit de Kajsa am Strand chli go jogge, isch u mega schön gsi! So gahd mer doch sogar no gärn go rennä!
Am Abig hemmer i eusem Ruum kochet und no chli Färnseh gluegt.

Am Fritig simmer dänn au am Morge früeh schowider usem Hus, sogar ohni Zmorge ässe und denn simmer uf San Diego gfahre. Det simmer en Kollegin vo de Brenda go bsueche, wo imne typische amerikanische riche viertel wohnt, so wie i de Filme beni mer vor cho. Sie het denn für eus Zmorge kochet wie imene füf Stärne Hotel. Hani natürlech gliebt, ich als Zmorgeliebhaberin. Nach dem guete Mal simmer denn alli zäme de Balboa Park in San Diego go aluege. Ich weiss ehrlichgseit au nöd gnau was de Park duet darstelle, aber es het es par rächt schöni Gebäude gha, es mega grosses Gwächshus mit schöne Blueme dinne und en japanische Garte, wo mir denn no sind es Teeli go trinke.
Nach eländ lange Zite simmer dänn äntlich go Znacht ässe im so genannte 'Thank God It's Friday', en guete Burgerplatz. Mitem Wyatt simmer denn no chli go d Stadt aluege, alli andere hend das natürli ned so interessant gfunde, mir Foreigner aber ebbe scho, für eus isch das öppis speziells! D Stadt hed mer also no rächt gfalle isch alles rächt gross gsi.
Am Abig sind denn alli usserd d Yvonne, d Kajsa und ich wider zrugg i dere Kollegin vo de Brenda ihres Hus und mir sind go d Seeport Village vo San Diego aluege. Au das isch u herzig gsi, s hed alles so chlini Lädeli gha ond schöni härzigi Restaurants und Yachte im Hafe. Dete simmer chli dür die Lädeli gstöberet und denn zum Abschluss vo dem Tag no es feins Glace go ässe :)

Gewächshus...

 

Teatime...

Balboa Park

San Diego City

Seeport Village

San Diego Sunset

third day in capistrano beach - DISNEYLAND!

WEEEEH ;D we went to Disneyland!
Am Morge am 7ni hemmer müesse ufstoh zom uf San Diego abefahre. Ufmene onglaublech riisige Parkplatz hemmer parkiert ond send denn metem Disneylandbus a Igang häre gfahre worde.
Aus erschts semmer sofort uf en Piratefahrt gange wou d Schlange mega chli gsi esch ond normalerwis stohsch det öppe 2 stonde ah, mer hend eifach chönne dranäne laufe. Wo mer fertig gsi send met dere Fahrt esch si grad gsperrt worde, well ergendöppis ned in Ornig gsi esch. Drom hemmer grad doppled Glöck gha. S Disneyland esch aber supper guet organisiert ond met dem vele Personal esch sone chline Fähler schnell weder greglet. Ehrlech gseit vo dete ah weiissi d Reihefolg nömm so gnau ;) Aber ech chan euch ganz gnau säge uf weli Bahne das mer gange send. Also.. zemmli am Afang semmer au no en Jungle ride, wo si en Jungel ufgstellt hend met all dene Tier ond Urwaldiwohner ond denne fahrsch metme chline Safari Bötli döre ond de Fahrer dod der alles erkläre. Esch vou härzig gsi ond die cheibe Denger hend no erstuhnlech ächt usgseh, werklech! Am Morge semmer ou no ines Geisterhus, was ech persöhnlech ned super duper interessant gfonde ha, ha scho besseri gse. Aber esch glich cool gsi! Denne semmer no ufne Bahn wo du met dim eigete Autöli omefahrsch ufere bestemmte Linie, so wie im Europapark ;). Ond notürlech semmer au uf die Berüehmtischti chlini Fahrt dör 'd Wält' wo si jedes Land representiered met chline Puppene wo alli singed: "It's a small world after all, It's a small world after all, It's a smaaaaall smaaaaaal world.. ond so witer" Weiss ned öb er das scho ghört hend, esch aber öppis zeemmlech berüehmts, allerdengs halt au meh för chlini Chender. Aber esch härzig gsi! Ond nocher louft der dä Song die ganz Zit nache & Jede sengts or sommts de ganzi Tag :) Mini lieblings Bahn escsh d 'Indianer Jones' gsi, wo'd so imne Charre hocksch wo usgseht wie en Jeep ond denne dör all das Züg dörefahrsch wie im Film. Esch onglaublech wie ächt das alles usgseht.! Ja.. das esch mini lieblings Bahn gsi ond au eini vo de wenigere wo tatsächlech chli wiene Achterbahn gsi esch.
Es hed au e Bahn gha 's Matterhorn, ond das & d Piratefahrt ond d Indianer Jones send die einzige "Achterbahne" gsi, allerdengs no lang nüt gäge d Silverstar :) Die Bahn (s Matterhorn) esch vou cool gsi ond die hend s Matterhorn in chli nachebildet, wo du denne druf ond drab ond rondome fahrsch i dim chline Schlette. Hani vou cool gfonde dass si im Disneyland eini vo de wechtigschte ond bekanntischte Bahne öppis schwizerischs hend. Sogar d Lüt wo a dere Bahn schaffid hend alli Latzhose ond es hömmli agha, wie i de Alpe :)
Zmettag gässe hemmer imne mega türe Restaurant wo im Gebäude vo de Piratebahn gsi esch, e Nachebeldig vo New Orleans, im Donkle met chline Latärne öberall. Mega härzigi Atmosphäre gsi ond notürlech s ässe hed mer gschmöckt :)
Au im Mickey Mouse sini Stadt ond ehn sälber semmer go bsueche, sogar im Mickey Mouse sis Hus hemmer chönne. Esch härzig gsi.
Noch no es paar andere Chender fahrte wie zom Bischpil Winnie the Poo ond Peterpan, wo ned  werklech en Achterbahn gsi send sondern s esch meh chli drom gange, was mer om sech ome gseht, semmer denne au no ine Star Wars Flugsimulation gange ond go Laserschüsse mache.
Am sächsi esch denne Zit gsi för d Parade, wo au super guet gmacht gsi esch, ond all die wechtige Disney Figure send awäsend gsi of ehrne Wäge. ;)
Noch de Parade semmer denne nomol uf d Matterhorn Bahn ond hend denne s Fürwärk gseh wo's donkel worde esch, oms Disneyland Schloss ome. ONGLAUBLECH was förnes guets Fürwärk die zeigt hend, han also no nie sones guets gse! Wörklech bezaubernd gsi. Ond sogar en lüchtendi Tinkerbell (wo en ächti Person gsi esch) esch no höck i de Loft om s Schloss omegfloge. Das esch öbrigens mine neui Traum-Näbejob. Als Tinkerbell amne seil om s Disneylandschloss omefahre. Das wär vou cool, ned?
Nachem Fürwärk hed denn s Disneyland zuegmacht ond mer send uf de Heiwäg gange. Super müed, nach 12 Stonde im Disneyland! Esch aber cool gsi!

second day in capistrano beach - shopping & the beach

Wöu mer ned so vell Zit gha hend am Mäntig i dere super fancy mall näb de Cheesecake factory, ond wöu d Yvonne ond mer Girls professionelli Shoppers send, send d Miranda, d Kajsa, d Miranda und Ich am Dsischtig Morge, währenddem die andere no am schlofe gsi send, nomol i die Mall. :) Esch en mega mega schöni Mall gsi. Alli mögleche guete Läde hemmer det gfonde. Also denne hemmer euse Morge i dere Mall verbrocht ond send denne weder zrog is Hotel ond no chli an Beach am Nommitag.Vo eusem Hotelzimmer hemmer nome müesse öberne Brogg zom d Stross öberquere ond scho semmer am schöne Beach gsi. En rechtig gmüetleche Tag muessi also säge, Shoppe, Beach, ond denne semmer no chli an Swimming Pool.
Am Obig hemmer Pizza bstellt gha ond denne beni met de Kajsa no schnell chli is Fitness go trainiere :) För d Track Season mömmer äbe au wemmer i de Ferie send mindestens jede zwöiti Tag renne oder Velofahre. Esch halt chli müesahm aber jäno.
Nach dem chline Bsuech im Hotel fitness esches denne au scho Zit gsi zom schlofe, wöu mer hend mösse mega früeh ufstoh am nögschte Morge. - Disneyland time!

i'm here aagain :D

heii! I know I know, it has been forever! But my last few weeks have just been soooo busy! Like really really busy!I am so sorry! But I guess this is a good sign ;) I'm having a lot of fun over here!

Also, fömmer doch mal ah met letschtem Wochenänd! Am Donnschtig hemmer en Trackmeet (Es renne gäg en anderi Schuel) gha aber ech han noni chönne teilnäh, well ech emmerno chli verletzt ben... Nochem Ttrackmeet beni met de Zayra ond de Kajsa i IN N OUT gange ond mer hend dete alli en Burger bstellt. Glaubid mer, wenn er ergendeinisch i euchem Läbe uf Californie gönd, denne mönder det ombidengt en Burger go bstelle! Esch so fein!
Uf jede Fall,.. am nögschte Morge hemmer Schuel frei gno ond send los zoge rechtig Los Angeles. D Yvonne, d Brenda, d Miranda, d Kajsa ond Ich. Mir sind go en mega gueti Kollegin vo minere Gastmuetter bsueche und hend denn det 2 Täg öbernachted. De Wyatt, mine Gastbrüeder wo in Oklahome is Collage god hed denne det au of üs gwarted wöu är Früehligsferie gha hed. Am Samschtig semmer ine Mall go shoppe. Ich han mir nor es Chleidli kauft ond es Tischi, wöui haut chli am spare ben för wenn mini Familie mech chond cho bsueche. Am Obig hemmer i de Miranda ihre Geburtstag gfiired. Sie esch 17ni worde! :) D Monique, i de Brenda ihri Kollegin, hed Lasagna kochet und mir hend es sehr feins Znacht gha.
Am Sunntig Morge simmer denn nomol en Stund in Süde gange, nöcher zu San Diego - in Capistrano Beach. Dete simmer denne is Hotel izoge und hend de Rescht vom Tag no chli gnosse. S Hotel isch zimmlich gmüetlich gsi, und mir hend e chuchi i eusem Appartment gha, drum simmer au no chli go Zässe chaufe. Am Abig hend d Kajsa und ich für alli koched will mir vill z müed gsi sind go usswärts ässe. ;)
Am Mäntig simmer nach Laguna Beach, die schöni Beachstadt go aluege. Es isch es mega schööns Städtli gsi mit vill Surferlädeli. Allerdings hani s Gfühl ga, s hed chli vill riichi, snobs umegha. Aber mir hends glich mega guet gha, und natürlich simmer widermal chli go lädele ;) Zum Znacht simmer i d Cheesecakefactory go ässe! Ond glaubed mer, das esch äbefalls eis vo de beschte Chette-Restaurants woni bis jetz so gha han do in Amerika. Onglaublech guete Food! Ond mega feini Dessert. I de Yvonne ehre Maa hed eus alli iglade, was mega mega lieb gsi esch vo ehm.! Ech han Lachs bstellt met Spargle ond Härdöpfustock ond zom Dessert en Oreocake! Natürlech hani kei Platz me gha i mim Büüchli vör s Dessert drom hemmers eifach alli hei brocht ;) Im Hotel semmer denn alli no schnäll in Pool gomped, respektiv ech in Pool ond alli andere i Whirpool. Ond denne esch de erschti Tag in Capistrano Beach au scho verbigfloge...
Fortsetzung folgt!

Ready for LA! :)

Trackpictures

Am Mäntig hemmer glöcklecherwis frei gha! Ech weiss zwar ehrlechgseit nedmou wiso, aber ech glaub es esch ergend en Lehrerwiterbeldig gsi oder so öppis ;) Aber jedefalls hend d Kajsa ond ech die Chance gnötzt ond hend en Coiffeurtermin veriibart. Mini Hoor send mer wörklech meh ond meh uf d Närfe gange, jetz hani eifach 20 cm abgschnette.. hihi!
Vöu meh hemmer ehrlechgseit a dem Tag au nömme gmacht, osser dasmer no is Fitness gange send esch das en zemmlech relaxte Tag gsi.
Am Dsischtig hemmer spöter Schuel gha am Morge, will die jüngere Schüeler alli ergend sone Test hend müesse mache, drum hani det schön Zit gha zum mit minere Familie skype und d Ferie chli plane.
Nach de Schuel hemmer im Track & Field Fottitag gha und de Fotograf hed müesse vo jedem einzelne Teilnehmer (erinnere s sind öppe 150) es Einzelfötteli mache und denne no Gruppeföttelis. Us dem Grund hemmer vill müesse warte und s Wätter isch meeeeeeeeeeeega unglaublich warm gsi.

D Sofie, ich und d Deanna 

D Sofie und ich, d Kajsa, d Zayra und d Deanna

Am Mittwuch Morge hemmer nomal spöter Schuel gha, drum sind d Deanna und d Zayra zu eus cho am Morge und mir hend zäme Pancakes gmacht und denne bi eus underem Pavillion gässe. Es isch unglaublich, am Morge mitme Tischi und churze Hose verusse Zmorge z ässe im März und es isch nöd mal chalt gsi!
D Pancakes sind würkli mega guet gsi, und nachdem mir fertig gässe gha hend isch den au scho Zit für d Schuel gsi und mir sind alli zäme id Schuel gfahre.

Jaaa.. Morn gömmer mit de Gastfamilie en Wuche uf LA und San Diego! und packed hani noni, drum gangi jetz gschider mal go schlofe.. guet nacht <3

hellöu

Also, scho länger hani nömme dröber brechted was ech so am mache ben ;)
Startemer letscht Fritig! S Training esch super easy gsi ond mer send nome ufem Gras rondene gseckled wöu mer alli so suuri Moskle gha hend vom Tag bevor. Drom hemmers alli ned so ärnscht gno ond es mega loschtigs Training gha :) Notürlech well Fritig gsi esch hend alli om so besseri Luune gha! S Wätter hed leider ned ganz so gstomme aber schösch esch alles in Ornig gsi.

Nochem Training beni met de Deanna, de Zayra ond de Kajsa uf San Luis Obispo gfahre ond dete semmer de chli i de Stadt ome gloffe ond hend Pizza gässe. S erschte mol woni werklech gueti Pizza gha, wo emmerhin verglichbar gsi esch met Pizza vo Italie! Ha grad mösse es fötteli mache met miner Pizza. Do äne esch d Pizza eifach ned s gliche wie deheime!
 San Luis Obispo esch eifach sone schöni Stadt zom chli omeloufe ond Znachtässe! Det fühli mi eifach emmer wohl. Ond s esch natürlech au en Studentestadt wäg em College 'Cal Poly' - us dem Grond heds au emmer vell Lüt (ned nor alti ;)) ome. Notürlech wie mer so send semmer no chli go lädele ond hend chli blöd doh öberau, das ou joo jede eus bemerkt ;)

Womers denne i SLO langsam gseh gha hend semmer weder zrog of Atascadero gfahre. D Deanna hed a dem Obig müesse Chender hüete ond well mer alli zu ehre hei send go schlofe semmer eifach met ehre met ond hend denne dete met ehre uf die Chend ufpassed wo allerdengs scho gschlofe hend. Natürlech hemmer en Film gluegt ond chli omeblödelet wederemol.. Met dene drü werds eim werklech eifach ned langwilig, mer hends emmer cheibe loschtig ond chöme halbe Lachchrämpf öber!

Euse Plan wär gsi, das mer nochem Babysitte gönd go "TB" (öppis wo do voll in esch bi de jugendleche wennd nüd bessers z tueh hesch; dosch eifach i de Lüt WC- Papier im Garte oms Züg go omeweckle! Ech gseh de Senn hender dem au ned werklech, kei angscht, aber scho veli Lüt hend mer gseid gha, das müegi ombidengt gmacht ha bevor ech denne weder hei gieng - drom, ergendeinisch muesch gäu ;)) Uf Jede Fall esch denne de Vater vo dene Chend wo mer ghüeted zemmli spot hei cho ond mer send noch dem mer zwöi ganzi Filme gluegt hend zemmli zemmli Müed worde ond darom hemmers leider nömme gmacht i dere Nacht, sondern send denne diräkt zu de Deanna hei ond hend bi ere im Trailer gschlofe. So müed semmer gsi...

Am Samschtig Morge hemmer no met ehne Zmorge gässe ond d Deanna hed eus uf ehrem Grondstöck omegfahre (JO! Metem Auto!) So gross esch das Grondstöck gsi, onglaublech! Do i de Schwiz wär das mehreri Millione wärt!
Am 12i hemmer denn aber au scho weder müesse hei go well mer send met de Yvonne ond de Brenda es Theater go luege, wo mer es Ticket deför i de Yvonne uf d Wiehnachte gschänkt hend. S theater esch rächt loschtig gsi, han allerdengs au scho bessers gse! ;) Noch dem semmer no fein go Znacht ässe ond das wärs denne au scho weder gsi för de Samschtig.

Am Sonntig hani vorgha met Frönde z skype aber denne semmer denne glich no id Chele gange ond au die Plän send denne wedermol chli omegmeschlet worde. Aber s coole esch das mer noch de Chele emmer gönd go fein Zmettag ässe. Das mol semmer im Olive Garden gsi, es italiänischs Restaurant ond ech han en sehr feini Tomatesoppe gässe ;) Nochem Zmettag semmer no i Target go Bikinis choufe ond ech han mech haut eifach wedermou ned chönne entscheide weles dasi han welle ond denne hanni jetz halt eifach drü neuii Bikinis kauft! hihi.. aber die cheibe chammer jo emmer bruche, hä!
Jajaja.. blablabla am Sonntig abig semmer met de Deanna ond de Zayra ond no zwöi anderne Kolleginne anes Fäschtli gange wo denn allerdengs ned werklech cool gsi esch ond es hed nome betronknigi Cowboys ome gha, drom semmer denne halt eifach weder hei, hend met de Miranda en feine Drink gmacht ond eusi Lieblingsserie gluegt ;) esch rächt gmüetlech gsi!

So vell zo mim Wochenänd.. danke förs verbiiluege!