mybigyear: boat launch.. or not ;)

Ich han scho immer welle uf LA abe, die schöne Stränd go aluege. Am Mäntig hani das äntlech mal chönne mache. d Brenda, d Yvonne ond ich send am Mäntig nochdem d Brenda esch go eri zwei Klassene im Fitness onterrechte uf d Fahrt gange in rechtig Süde. Euse Plan isch gsi das mir binere Kollegin vo de Brenda öbernachted und denne am nögschte Morge früeh ufstönd und gönd go luege wie ihrere Cousine sin risige Katamoran is Wasser lod. Ich bin natürlich mega gspannt gsi!So am füfi simmer ide Brenda sine Cousin go bsueche und hend mit ihm Znacht gässe imne super feine mexikanische Restaurant. De Cousin esch en mega coole gsi und mir hend es super Znacht gha. Nach dem mir alli supper voll gsi sind simmer den uf die nögschti eistündigi Autofahrt gange. Mir sind zmitzt dür LA und Hollywood gfahre und das isch mega schön gsi i de Nacht mit all de Liechter. Mir sind zu de Brenda ihrere HighSchool Fründin vo früehner gange und hend denn döte chönne übernachte. Die sind mega gaschtfründlich gsi und mir hends au mit dene mega luschtig gha. Am nögschte Morge hed d Brenda es SMS übercho, dass de ganzi Boot event hed müsse verschobe wärde, will öppis mitere Erlaubnis uf de Strass nöd klapped hed. Mega schad! Aber mir sind dänn schlussändlich glich go de Katamoran aluege und das Ding isch riisig gsi! Die Familie hend sächs Chinder, alli 13ni oder jünger und die hend de grossi Katamoran kauft und jetzt gönd si denne für 5 jahr uf dem Katamoran läbe. Die Familie isch so cool - ihr glaubids gar ned, so gelasse mit all dene Chind und s Boot isch nonigmal würkli fertig aber sie sind glich alli so abentürgluschtig ;) Und dezue sind sie au no halb schwizerisch. Sie hend mich au no iglade zum de Rest vo de Wuche mit ihne y verbringe und denne no chli ufem Boot mit ihne mit z' fahre aber leider leider leider han ich scho Plän gha.

Nachdem mir sind go s Boot aluege hed eus d Familie wumer übernachted hend i ihres Hotel iglade zum zmittag ässe am Beach. Es isch wunderschön gsi dete und mir hend u fein gässe. Mir sind au no a Newport Beach gange wo öppe füüf minute wäg isch gsi und döt chli go Fötteli mache mit minere neuere Kamera.

Ich weiss no letscht jahr, wueni immer mit de Elena O.C Californie im Färnseh gluegt han und das handlet sich alles in Newport Beach, aber damals hätt ich mir doch nie erträumt das ich ganz nöch vo det würd es Ustuschjahr mache und sogar mal Newportbeach go bsueche. :) und jetz bini daa :D

Nach dem hemmer eus denn wieder uf de Heimwäg gmacht (vier Stunde Autofahre), und mir hend natürlich no Starbuks Stop gmacht ufem Wäg :) Isch en mega schööne chline Trip gsi!