Winterformal!! ❅

De Tag vo Winterformal isch au schowider verbii... De ganzi Samschtig isch nume drum gange, eus für de Ball am Abig vorbereite. D Yvonne isch zu eus cho mit Sandwich als Zmittag. Alli zäme hemmer zmittag gässe und denne isch au scho d Tante Sherry cho. Mir hend eusi Nägel gmacht, was bi mer unglaublich lang brucht hed und denne mini Haar, wo sogar no länger brucht hed.. die cheibe wend eifach ned Lockig si! ;( Denne natürli au no Make up und ichleide. Wummer alli äntlich parat gsi sind isch de Gastschwöschter ihre Fründ zu eus cho und mir hend alli zäme es paar Fötteli gmacht. Nach dem sind ich und d Kajsa zu de Janay hei und hend dete nomal Fötteli gmacht mit ihre und de Sierra und em Jonathan. (Viel Fötteli! ;))

De Jonathan und d Sierra sind seperat go Znachtässe und ich und d Kajsa hend denne eifach bi de Janay deheime gässe. Ihri Eltere hend fur eus kochet und mir hend es schöns Znacht vorbereited. S isch mega fein gsi und mir hends also voll gmüetlich gha. Koched hend si pasta alfredo und en mega feinem Salat.

So um die achti hemmer eus denne uf de Wäg gmacht nach Paso, wo de Ball stattgfunde hed. Es isch mega komisch gsi, alli Schüeler so ufdressd z gse! D Halle isch mega schön dekoriert gsi ond s Thema das Johr esch gsi Alice im Wonderland. Es hed es Minigolfegge, en Felmegge, en Ässegge en Fottiegge, en Setzegge, en Teepartyegge ond notürlech en risigi Tanzflächi gha.

 Ech ben werklech öberrascht gsi wie guet eusi Leadershipgroppe das alles organisiert hed. Idrocksvoll! Mer send natürlech hauptsächlech uf de Tanzflächi gsi met es paar chline Abstächer i Fotti ond i Drenkegge ;) Wasser do in Amerika natürlech... :) D Musig esch ab ond zue chli komisch gsi, muessi also säge so einzelni Slowdance Songs ond so aber im grosse ond ganze esch d Musig in ornig gsi ond mer hend chönne abdance! Met de Zit hani allerdengs mini High Heels abzoge well omegompe i Highheels esch also ned grad s bequemschte Deng wueni je gmacht han! Am 11:45 esch den das Fäscht aber au scho fertig gsi ond de Janay eres Mami hed eus abgholt.

Ech muess also säge förne Schuelalass hani das schono meeeega cool gfonde ;) sötts öfters mol gä. Ond de Kolleg hed mer ou verzellt das denne Prom sogar no vell besser werd - allerdengs sett mer dete es date haa.. hihi